എന്തായിരിക്കും ഇതിനുള്ള കാരണങ്ങൾ?
.........................................................................
ഒരു ദിവസം വഴിയിൽ വച്ച് മൂന്നുപേർ ഞങ്ങളുടെ കാറിന് കൈ കാണിച്ചുകൊണ്ട് ഇങ്ങനെ പറഞ്ഞു: പാവപ്പെട്ട കിഡ്നി രോഗികൾവർക്ക് സൗജന്യമായി ഡയാലിസിസ് ചെയ്തുകൊടുക്കാനുള്ള ഫണ്ട് ശേഖരണമാണ്. കഴിയുന്ന രീതിയിൽ സഹായിക്കണം. മറ്റൊരു ദിവസം, ഒരാളുടെ വൃക്കമാറ്റിവക്കാൻ സാമ്പത്തിക സഹായം നലകണമെന്ന് ലൗഡ് സ്പീക്കറിലൂടെ ആവശ്യപ്പെട്ടുകൊണ്ട് കടന്നുപോവുകയായിരുന്ന കാറിൽ നിന്ന് രണ്ട് പേർ ഒരു നോട്ടീസ് നീട്ടിക്കൊണ്ട് ഇങ്ങനെ പറഞ്ഞു: ഞങ്ങളുടെ നാട്ടിലെ പാവപ്പെട്ടൊരു ചെറുപ്പക്കാരന് അടിയന്തിരമായി കിഡ്നി മാറ്റിവയ്ക്കണം. അതിന് വലിയൊരു സംഖ്യ ആവശ്യമായി വന്നതിനാൽ അതിന്റെ കലക്ഷനുവേണ്ടി ഇറങ്ങിയ ചാരിറ്റി പ്രവർത്തകരാണ്, കഴിയുന്ന സഹായങ്ങൾ ചെയ്യണം.
നമ്മുടെ നാട്ടിൽ അടുത്ത കാലത്തായി ഇത്തരം കാഴ്ചകൾ സാധരണയായി കണ്ടുവരുന്നുണ്ട്. ഏതാനും വർഷങ്ങൾക്കുമുമ്പുവരെ അത്രയൊന്നും പ്രചാരത്തിലില്ലായിരുന്ന ഡയാലിസിസ് സെന്ററുകൾ ഇന്ന് ഗ്രാമങ്ങളിൽ പോലും വ്യാപകമായിക്കഴിഞ്ഞിരിക്കുന്നു. പ്രായവ്യത്യാസമില്ലാതെ
വൃക്കരോഗികളുടെ എണ്ണവും നമ്മുടെ നാട്ടിൽ അനുദിനം വർദ്ധിച്ചുകൊണ്ടിരിക്കുന്നു. എന്തായിരിക്കും ഇതിനുള്ള കാരണങ്ങൾ?
ഭക്ഷണത്തിലൂടെയോ വെള്ളത്തിലൂടെയൊ ശരീരത്തിന് ഹാനികരമായ എന്തെങ്കിലും പദാർത്ഥങ്ങൾ അടുത്ത കാലത്തായി അമിതമായ അളവിൽ നമ്മുടെ ശരീരത്തിനുള്ളിലെത്തുന്നത് കൊണ്ടാവാം ഇത്തരം രോഗങ്ങൾ വർദ്ധിച്ചുവരാൻ കാരണമെന്ന് പലരും അഭിപ്രായപ്പെടുന്നുണ്ട്. എന്നാൽ അതെന്താണെന്ന് പഠനം നടത്താനും കണ്ടെത്താനും ജനങ്ങളെ ബോധവൽക്കരിക്കാനും കാര്യമായ ശ്രമങ്ങൾ ഒരു ഭാഗത്തും നടക്കുന്നില്ല. മാത്രമല്ല, അനുദിനമെന്നോണം കൂടിക്കൊണ്ടിരിക്കുന്ന രോഗികൾക്ക് ചികിലസാ ഫണ്ട് ശേഖരിച്ചുകൊടുക്കാനും കൂടുതൽ കൂടുതൽ ഡയാലൈസിസ് സെന്ററുകൾ തുറക്കാനുമുള്ള ശ്രമങ്ങളുമാണ് പല ഭാഗത്തും നടന്നുകൊണ്ടിരിക്കുന്നതും.
മായം കലരാത്ത ഒരു ഉല്പന്നം പോലും നമ്മുടെ നാട്ടിൽ ലഭിക്കാത്ത ഒരു സാഹചര്യമാണ് ഇന്നുള്ളതെന്ന്
എല്ലാവർക്കുമറിയാം. വിപണിയിൽ കിട്ടുന്ന എല്ലാത്തരം ഭക്ഷണ സാധനങ്ങളിലും നിറം, മണം, രുചി മുതലായവയ്ക്കായി ചേർത്തിരിക്കുന്ന കൂട്ടുകളിൽ, അനുവദിച്ചിട്ടില്ലാത്ത പല രാസ വസ്തുക്കളും ചേർക്കുന്നതായും, അനുവദിച്ചിട്ടുള്ളവതന്നെ വളരെ കൂടിയ അളവിൽ ചേർത്തിരിക്കുന്നതായും പല സർവ്വേകളും വെളിപ്പെടുത്തുന്നു. പഴങ്ങൾ കൃത്രിമമായി പഴുപ്പിക്കാൻ രാസവസ്തുക്കളും, അവ കേടാകാതെ ദീർഘകാലം സൂക്ഷിക്കാൻ കീടനാശിനികളും ചേർക്കുന്നതായുള്ള വാർത്തകൾ കേട്ട് കേട്ട് നമുക്കിന്നതൊരു പ്രശ്നമല്ലാതായിരിക്കുന്നു. പെട്ടിക്കടകളിൽ പോലും ഇന്ന് പല നിറത്തിലും രുചികളിലുമുള്ള ശീതളപാനീയങ്ങൾ സുലഭമാണ്.
കുട്ടികൾ ധാരളമായി വാങ്ങിക്കഴിക്കുന്ന പല മിഠായികളിലും, ചോക്ലേറ്റുകളിലും ടൂത്ത്പേസ്റ്റുകളിൽ പോലും മാരകമായ രാസവസ്തുക്കൾ ചേർക്കപ്പെടുന്നുണ്ടെന്നറിയാമെങ്കിലും നമ്മളത് മക്കൾക്ക് സ്നേഹത്തോടെ വാങ്ങിക്കൊടുക്കുന്നു. രുചിക്കും കേടുവരാതിരിക്കാനും വേണ്ടി മാരകമായ വസ്തുക്കൾ ചേർത്തുണ്ടാക്കുന്ന കറിപ്പൊടികൾ, പാക്കഡ് ഫുഡ്സ്, ബേക്കറി ഉല്പന്നങ്ങൾ, ഭക്ഷ്യ എണ്ണകൾ തുടങ്ങിയവയെല്ലാം കൃത്യമായ ഗുണനിലവാര പരിശോധനകൾ നടത്താതെ വിപണിയിലെത്തുന്നതിനു പിന്നിൽ ഉല്പാദകരും ഉദ്യോഗസ്ഥരും തമ്മിൽ രഹസ്യ ധാരണകളുണ്ടെന്ന് പലർക്കും അറിയാമെങ്കിലും അതിനെക്കുറിച്ചൊന്നും അധികമാരും പരാതിപ്പെടാറില്ല. അടുത്ത കാലത്തായി വർദ്ധിച്ചുവരുന്ന കിഡിനി രോഗങ്ങളടക്കമുള്ള പല രോഗങ്ങൾക്കും ഇതൊക്കെ കാരണങ്ങളായിരിക്കാം.
നമ്മുടെ ജീവിത ശൈലിയിലും ഭക്ഷണ ക്രമത്തിലും മാറ്റങ്ങൾ വരുത്താൻ നമ്മെ ഏതെങ്കിലും മരകരോഗം പിടികൂടുന്നതുവരെ നമ്മൾ കാത്തിരിക്കേണ്ടതുണ്ടോ? വിപണികളിലെത്തുന്ന ഭക്ഷണ സാധനങ്ങളുടെ ഗുണനിലവാരം കർശനമായി പരിശോധിച്ച് നടപടികളെടുക്കാൻ ഭക്ഷ്യവിഷബാധയേറ്റ് ആരെങ്കിലും മരിക്കുന്നതുവരെ കാത്തിരിക്കുകയാണോ ബന്ധപ്പെട്ട വകുപ്പുകൾ ? സുരക്ഷാ ക്രമീകരണങ്ങൾ കർശനമായി നടപ്പിലാക്കാൻ എവിടെയെങ്കിലും ഒരപകടമുണ്ടാകുന്നത് വരെ കാത്തിരിക്കുകയാണോ ബന്ധപ്പെട്ട ഉദ്യോഗസ്ഥന്മാർ ?
തെറ്റായ ഭക്ഷണ ശീലങ്ങൾകൊണ്ട് നമ്മുടെ ആന്തരികാവയവങ്ങൾ തകരാറിലായിപ്പോയാൽ ഭീമമായ സംഖ്യ മുടക്കി അത് മാറ്റിവച്ചാൽ പോലും അതെത്രത്തോളം സുരക്ഷിതമാണെന്ന് ആർക്കും ഉറപ്പ് നൽകാനാവില്ലല്ലൊ. അതിനാൽ സ്വന്തത്തെയും കുടുംബത്തെയും ഇത്തരം രോഗങ്ങളിൽ നിന്ന് രക്ഷിക്കാനുള്ള ഉത്തരവാദിത്വം ഓരോരുത്തരുടേതുമാണെന്ന് മനസ്സിലാക്കി തെറ്റായ ഭക്ഷണ ശീലങ്ങൾ ഒഴിവാക്കിത്തുടങ്ങുക. ഹാനികരമായ വസ്തുക്കൾ ചേർത്തുണ്ടാക്കുന്ന ഭക്ഷ്യ ഉല്പന്നങ്ങളെയും പാനീയങ്ങളെയും അമിതമായി ആശ്രയിക്കുന്നത് ഉപേക്ഷിക്കുക. നിറവും രുചിയും മാത്രം നോക്കി ഭക്ഷണ സാധനങ്ങൾ വാങ്ങിക്കഴിക്കുന്നതും മക്കൾക്ക് വാങ്ങിക്കൊടുക്കുന്നതും ഒഴിവാക്കുക. ഭക്ഷണം കണ്ണിനെയും നാവിനെയും മാത്രം തൃപ്തിപ്പെടുത്തുന്നതായാൽ പോരെന്നും അത് ശരീരത്തിനുകൂടി ഗുണകരമായിരിക്കണമെന്നും മക്കൾക്ക് പറഞ്ഞുകൊടുക്കുക. ഇതൊക്കെയാണ് ഈ സാഹചര്യത്തിൽ നമുക്ക് ചെയ്യാൻ
കഴിയുന്ന കാര്യങ്ങൾ!
..................................
റസാഖ് വഴിയോരം
.................................
No comments:
Post a Comment